رجعان بن سالم بن نعيمان العوفي

يقول من هو عايش بين جيلين
ولاهو منًصب بين الأجيال قاضي
وجدي وجود اللي عياله مساجين
ومن الحزن غاشي عيونه بياضي
وزود على ما فيه متحمل دين
ويزيد حزنه ليا بغاله مقاضي
الضغط عنده يرتفع فوق ميتين
ضغطه يزيد وسكره بانخفاضي
وعز الله إني منوسن مثله البين
لكن عن بعض الامور أمتغاضي
ماهو على كنز الذهب والملايين
على بديون يرتعون الفياضي
يتلون رغبات البكار المزايين
وضحن عليهن مطرقين العياضي
بدون مراتعهم من التين ويمين
ويتلون برًاق الحياء وين ناضي
ليا منهم شدوا من الجو مقفين
وكفو على المرحال تال الحياضي
وسهيل عقب الفجر مشيوف بالعين
مقفي سموم القايله والرماضي
يومن يشدونه ويومن مقيمين
وراع الشياه وراعي البل راضي
يلين وصلوا دبرتن نبتها زين
والسيل مع غير المساييل فاضي
وياويل حالي وين أنا والبدو وين
مغير ذكرى تمرني فعل ماضي
وهذي حقيقه حطها بين قوسين
ماعاش حي إلا وراءه إنقراضي

الشاعر: رجعان سالم نعيمان العوفي