الشاعر : رجعان بن سالم الهرساني العوفي

الله على الي لامشى يطوي البيد .. والبعد قدامه يقوم يتلاشى

الى اتقى حيد وتباين طرف حيد .. لولا الثقه قلت الرواسي تماشى

ابي الى كثرة علي اللواهيد .. وقامت همومي في ضميري تحاشى

اسج مع جرد السهال الجراهيد .. وصوانها بعيني جواهر تواشى

وخويي الي ماهو زيدٍ ولاعبيد .. هرجه بلل على الكبود العطاشى

لاشافني يلغي جميع المواعيد .. وانا على شوفه يجيني خراشه

والى هرجانا مانهرج بالمناقيد .. نسمو وعن بعض الامور نتحاشى

ولا نردد الهرجه ولانعيد ونزيد .. امــا جــديد العلــم ولا بلاشـــــى

يعرف وش اقصد واعرف وش يريد .. والعرف يكفي عن كثير النقاشى

والى وصلنا ديرة الفيد والصيد .. نرمي الحطب قدام نرمي الفراشى

ونجهز الدله قدام البراريد .. جزلن حطبها سمر ماهو قشاشى

في واديٍ عشبه غاديله عناقيد .. برض مطرها سيل ماهو رشاشى